ரோல்ஸ் ராய்ஸ் விவகாரம் : நடிகர் விஜயின் மேல்முறையீட்டு வழக்கில் சென்னை உயர்நீதிமன்றம் உத்தரவு

19 July 2021, 12:45 pm
Quick Share

சென்னை : தான் வாங்கிய ரோல்ஸ் ராய் காருக்கு நுழைவு வரியில் இருந்து விலக்களிக்க கோரிய வழக்கில், நடிகர் விஜய் மேல் முறையீட்டு வழக்கில் சென்னை உயர்நீதிமன்றம் புதிய உத்தரவை பிறப்பித்துள்ளது.

நடிகர் விஜய், கடந்த 2012 ஆம் ஆண்டு இங்கிலாந்தில் இருந்து ரோல்ஸ் ராய்ஸ் சொகுசு காரை இறக்குமதி செய்தார். இந்த சொகுசு காருக்கு வணிக வரிதுறை நுழைவு வரி விதித்தது. இதை எதிர்த்தும், வரி விதிக்கத் தடை கோரியும் நடிகர் விஜய் தரப்பில் உயர்நீதிமன்றத்தில் வழக்கு தொடரப்பட்டது.

இந்த வழக்கை விசாரித்த நீதிபதி எஸ்.எம்.சுப்ரமணியம், “நடிகர்கள் நிஜ வாழ்விலும் ரீல் ஹீரோக்களாக இருக்கக் கூடாது. வரி செலுத்துவது நன்கொடை போன்றது அல்ல, நாட்டி ற்கு குடிமகன்கள் செய்ய வேண்டிய கட்டாய பங்களிப்பு. சமூக நீதிக்கு பாடுபடுவதாக கூறிக் கொள்ளும் நடிகர்கள் வரி ஏய்ப்பு செய்வதை ஏற்றுக்கொள்ள முடியாது,” என கண்டனம் தெரிவித்தார். இந்த வழக்கை தள்ளுபடி செய்த அவர், ரூ.1 லட்சம் அபராதமும் விதித்தார்.

நீதிமன்றத்தின் இந்த உத்தரவை எதிர்த்து எதிர்த்து நடிகர் விஜய் மேல் முறையீடு செய்தார். தனி நீதிபதி எஸ்.எம்.சுப்ரமணியம் பிறப்பித்த தீர்ப்பின் நகல் இல்லாமல் மேல்முறையீட்டு மனுவை விசாரணைக்கு பட்டியலிடக் கோரியும் நடிகர் விஜய் அந்த மேல்முறையீட்டில் கூறியிருந்தார். இந்த வழக்கு, நீதிபதிகள் சுந்தரேஷ், மஞ்சுளா அமர்வில் 19ம் தேதி விசாரணைக்கு பட்டியல் இடப்பட்டிருந்தது. மேலும், தீர்ப்பில் தன்னை பற்றி குறிப்பிட்டுள்ள விமர்சனங்களை நீக்கவும் நடிகர் விஜய் கோரிகை வைத்திருப்பதாகக் கூறப்பட்டது.

இந்த நிலையில், நடிகர் விஜய் தொடர்ந்த மேல்முறையீட்டு வழக்கு இன்று விசாரணைக்கு வந்தது. அப்போது, விஜயின் விசாரணையை, வரி தொடர்பான மேல்முறையீட்டு வழக்குகளை விசாரிக்கும் அமர்வுக்கு மாற்றம் செய்து சென்னை உயர்நீதிமன்றம் உத்தரவிட்டுள்ளது.

Views: - 139

0

0