மருத்துவப்படிப்புக்கான பொது கலந்தாய்வு இன்று தொடங்குகிறது…!!

23 November 2020, 8:22 am
counselling - updatenews360
Quick Share

சென்னை: மருத்துவப்படிப்புக்கான பொது கலந்தாய்வு இன்று தொடங்கவுள்ள நிலையில் முதல்நாள் கலந்தாய்வுக்கு 361 பேர் அழைக்கப்பட்டுள்ளனர்.

மருத்துவப்படிப்புக்கான கலந்தாய்வு கடந்த 18ம் தேதி முதல் தொடங்கி நடைபெற்று வருகிறது. முதலில் இந்த ஆண்டு அமல்படுத்தப்பட்டு இருக்கும் அரசு பள்ளி மாணவர்களுக்கான 7.5 சதவீதம் ஒதுக்கீடு மூலம் கலந்தாய்வு நடத்தப்பட்டது. இதன் மூலம் அரசு பள்ளி மாணவ-மாணவிகளுக்கு 405 இடங்கள் கிடைத்தன.

இந்த கலந்தாய்வு மூலம் 399 இடங்களை மாணவ-மாணவிகள் தேர்வு செய்தனர். இதன் தொடர்ச்சியாக விளையாட்டுப்பிரிவு, மாற்றுத்திறனாளிகள் பிரிவு மற்றும் முன்னாள் படைவீரர்களின் வாரிசுகள் ஆகிய சிறப்பு பிரிவு மாணவர்களுக்கான கலந்தாய்வு நேற்று முன்தினம் நடத்தப்பட்டது. அதில் விளையாட்டு மற்றும் முன்னாள் படைவீரர்களின் வாரிசுகள் பிரிவில் அனைத்து இடங்களும் நிரம்பிய நிலையில், மாற்றுத்திறனாளிகள் பிரிவில் இருந்த 132 இடங்களில் 41 இடங்கள் மட்டுமே நிரப்பப்பட்டன. இதில், 91 இடங்கள் காலியாகின.

இந்நிலையில் மருத்துவப்படிப்பில் பொதுப்பிரிவு மாணவர்களுக்கான கலந்தாய்வு இன்று தொடங்குகிறது. இதற்கான அட்டவணையை ஏற்கனவே தமிழ்நாடு மருத்துவ மாணவர் சேர்க்கை அலுவலகம் வெளியிட்டிருந்தது. அதன்படி முதல் நாளில் தரவரிசை பட்டியலில் 1 முதல் 361 வரையில் இருப்பவர்களுக்கு அழைப்பு விடுக்கப்பட்டுள்ளது.

பொதுப்பிரிவு மாணவர்களுக்கான கலந்தாய்வு இன்று காலை 9 மணி, 11 மணி, பிற்பகல் 2 மணி என 3 கட்டங்களாக நடைபெற உள்ளது. மாணவ-மாணவிகள் தங்களுக்கான அழைப்பு கடிதத்தை இணையதளம் மூலம் பதிவிறக்கம் செய்ய ஏற்கனவே அறிவுறுத்தப்பட்டுள்ளது.

Views: - 0

0

0