‘ரூ.20 ஆயிரம் கொடு… செல்போன எடு’… கைதிகளுக்கு ஆஃபர் கொடுத்த சேலம் மத்திய சிறை அதிகாரி..!!

Author: Babu Lakshmanan
20 January 2022, 11:20 am
Quick Share

சேலம் : சேலம் மத்திய சிறையில் சிறை அதிகாரியே, 20 ஆயிரம் பணம் வாங்கிக்கொண்டு கைதிக்கு செல்போன் கொடுத்த சம்பவம் பெரும் பரபரப்பை ஏற்படுத்தியுள்ளது.

சேலம் மத்திய சிறையில் நீண்ட நாட்களுக்கு பிறகு கைதியிடம் செல்போன் பயன்பாடு இருப்பதாக சிறைத் துறை அதிகாரிகளுக்கு ரகசிய தகவல் கிடைத்தது. இதையடுத்து, சோதனை குழுவில் இடம்பெற்றுள்ள வார்டன்கள் பிரபாகரன், பாலமுருகன், மாதேஸ்வரன், பூபதி ராஜா, கார்த்திக்,விஜய் ஆகியோர் சிறையில் உள்ள அறைகளில் நேற்று திடீர் சோதனை நடத்தினர்.

அப்போது டியூப்லைட் பட்டியில் செல்போன், தலை துவட்டும் துணியில் சார்ஜர் ஒயர் மற்றும் சோப்பில் சிம் கார்டு உள்ளிட்டவைகள் மறைத்து வைக்கப்பட்டிருந்தது கண்டுபிடிக்கப்பட்டு அனைத்தும் மீட்கப்பட்டது. இது தொடர்பான விசாரணை நடத்தியதில் குண்டர் தடுப்பு சட்ட கைதிகள் சண்முகம், கார்த்தி மற்றும் விசாரணை கைதி ரவிக்குமார் ஆகியோருக்கும் பறிமுதல் செய்யப்பட்ட செல்போனுக்கும் தொடர்பிருப்பதாக தெரியவந்தது.மேலும் சிறை அதிகாரி ஒருவருக்கு தொடர்பு இருப்பது கண்டுபிடிக்கப்பட்டது.

இதில் கைதி கார்த்தியிடம், அதிகாரிகள் கிடுக்குப்பிடி விசாரணை நடத்தியதில் 20 ஆயிரம் கொடுத்து செல்போனை சிறைக்குள் கொண்டு வந்ததாக தெரிவித்தார். கொலை முயற்சி வழக்கில் கைதாகி 8 மாதமாக சிறையில் இருக்கும் கார்த்தி, கோபி என்ற கைதி கேட்டதால் செல்போனை உள்ளே கொண்டுவர நடவடிக்கை எடுக்கப்பட்டுள்ளது. இது குறித்து உதவி சிறை அதிகாரி ராகவனிடம் 20 ஆயிரம் பணம் கொடுத்து அவர் மூலமாக செல்போனை கைதி சண்முகத்திடம் கொடுக்கப்பட்டுள்ளதாக எழுத்துப்பூர்வமாக எழுதி கொடுத்துள்ளனர். அதிகாரியே கைதிக்கு செல்போன் கொடுத்த தகவலை உயர் அதிகாரிகள் கேட்டு அதிர்ச்சியடைந்துள்ளனர்.

இதையடுத்து ஜெயிலர் ராஜமோகன் அஸ்தம்பட்டி காவல் நிலையத்தில் சிறையில் செல்போனை மறைத்து வைத்திருந்த கைதிகள் சண்முகம், கார்த்தி, ரவிக்குமார் ஆகியோர் மற்றும் தடை செய்யப்பட்ட செல்போனை கைதிக்கு கொடுத்த உதவி சிறை அதிகாரி மீதும் வழக்குப் பதிவு செய்து நடவடிக்கை எடுக்குமாறு புகார் கொடுத்துள்ளார். இது குறித்து போலீசார் விசாரணை நடத்தி வருகின்றனர்.

கைதிகள் கூறுவதுபோல் செல்போனை உதவி சிறை அதிகாரிகள் தான் கொடுத்தாரா? என்பது குறித்து சிறை அதிகாரிகள் விசாரணை நடத்தி வருகின்றனர். எப்போது எந்த நேரத்தில் செல்போன் கொடுக்கப்பட்டது அப்போது உதவி சிறை அதிகாரி எங்கிருந்தார்? என்பது குறித்து விசாரணை நடைபெற்று வருகிறது.

Views: - 295

0

0