சதுரகிரி சுந்தரமகாலிங்கம் கோவிலில் குவிந்த பல்லாயிரக்கணக்கான பக்தர்கள்

17 September 2020, 4:23 pm
Quick Share

விருதுநகர்: பிரசித்தி பெற்ற ஸ்ரீவில்லிப்புத்தூர் சதுரகிரி சுந்தரமகாலிங்கம் கோவிலுக்கு மகாளய அமாவாசையை முன்னிட்டு பல்லாயிரக்கணக்கான பக்தர்கள் குவிந்தனர்.

விருதுநகர் மாவட்டம் ஸ்ரீவில்லிபுத்தூர் அருகே மேற்குத் தொடர்ச்சி மலைப்பகுதியில் தரைமட்டத்திலிருந்து சுமார் 4500 அடி உயரத்தில் அமைந்துள்ளது பிரசித்தி பெற்ற சதுரகிரி சுந்தர மகாலிங்கம் கோயில்.இந்த கோயிலுக்கு மாதந்தோறும் அமாவாசை 4 நாட்கள், பெளர்ணமி 4 நாட்கள் என மொத்தம் 8 நாட்கள் மட்டுமே பக்தர்கள் கோவிலுக்கு செல்ல வனத்துறை அனுமதி அளித்துள்ளது. இந்நிலையில் கடந்த 5 மாதங்களுக்கு மேலாக கொரோனா வைரஸ் தொற்று காரணமாக பக்தர்கள் கோவிலுக்கு செல்ல தடை விதிக்கப்பட்டு இருந்தது.பின்னர் தமிழக அரசு கடந்த 1ஆம் தேதி முதல் அனைத்து வழிபாட்டு தலங்களும் திறக்கலாம் என அறிவிக்கப்பட்டது.

இந்நிலையில் இன்று மகாளய அமாவாசையை முன்னிட்டு கடந்த 15 ஆம் தேதி முதல் நாளை வரை 4 நாட்கள் பக்தர்கள் கோயிலுக்கு சென்று தரிசிக்க கோயில் நிர்வாகம் சார்பில் அனுமதி வழங்கப்பட்டுள்ளது. இந்நிலையில் இன்று மகாளய அமாவாசையை முன்னிட்டு சதுரகிரி கோயிலுக்கு தமிழகத்தின் பல்வேறு பகுதியில் இருந்து அதிகாலை முதலே பல்லாயிரக்கணக்கான பக்தர்கள் குவிந்து சாமி தரிசனம் செய்து வருகின்றனர். கொரோனா அச்சம் காரணமாக கோயில் நிர்வாகம் காலை 7 மணி முதல் மதியம் ஒரு மணி வரை மட்டுமே பக்தர்கள் கோயிலுக்கு செல்ல அனுமதி அளித்துள்ளது. வெப்ப பரிசோதனை செய்த பின்னரே பக்தர்கள் அனுமதிக்கபடுகின்றனர். கோயிலுக்கு குழந்தைகள் மற்றும் முதியவர்கள் வந்தால் கோயில் நிர்வாகம் திருப்பி அனுப்பி வருகிறது.

Views: - 12

0

0