ஊராட்சி துணைத் தலைவர் வெட்டிக் கொலை: தனிப்படை அமைத்து தீவிர விசாரணை

Author: kavin kumar
20 August 2021, 3:31 pm
Quick Share

விருதுநகர்: விருதுநகர் அருகே ஊராட்சி துணைத்தலைவர் கூலிப் படையினரால் வெட்டி கொலை செய்யப்பட்டார்.

விருதுநகர் மாவட்டம் வச்சக்காரப்பட்டி அருகே உள்ள தடங்கம் கிராமத்தை சேர்ந்தவர் அனந்தராமன். இவரது மனைவி கலைச்செல்வி. இவர்களுக்கு ஜெயஆர்த்தி, ஜெயபூர்த்தி என இரு மகள்கள் உள்ளனர். இவர்கள் இருவரும் இரட்டையர்கள். அனந்தராமன் கடந்த 2006 முதல் 2016 வரை வச்சக்காரப்பட்டி ஊராட்சி தலைவராக பொறுப்பு வகித்தவர். 2016ல் இந்த ஊராட்சி தனி ஊராட்சியானது. தற்போது ஊராட்சி மன்ற துணைத் தலைவராக அனந்தராமன் பொறுப்பு வகித்து வந்தார். மேலும் ஒப்பந்த அடிப்படையில் டாஸ்மார்க் லாரிகளும் இயக்கி வந்தார். இந்நிலையில் தன்னிடம் பணியாற்றும் குருசாமி என்பவரது திருமணம் தடங்கம் கிராமத்தில் இன்று நடைபெற்றது. திருமணத்திற்கு வந்த அனந்தராமன் மணமக்களை வாழ்த்திவிட்டு,

தனது காரில் ஏறுவதற்காக சாலைக்கு வந்த போது இரு சக்கர வாகனங்களில் வந்த தலைப்பாகை கட்டிய மர்ம நபர்கள் 4 பேர் அனந்தராமனை அரிவாள் மற்றும் கத்தியால் வெட்டி கொலை செய்து விட்டு தப்பி ஓடினர். இதனால் அப்பகுதியில் பரபரப்பு ஏற்பட்டது. தகவலறிந்து சம்பவ இடத்திற்கு வந்து எஸ்பி மனோகர், டிஎஸ்பி அருணாச்சலம் மற்றும் வச்சக்காரப்பட்டி போலீசார் விசாரணை நடத்தினர். மோப்பநாய் வரவழைக்கப்பட்டு விசாரணை மேற்கொள்ளப்பட்டது. ஊராட்சி நிர்வாகம் தொடர்பாக அனந்தராமன் ஊராட்சி தலைவி ஜெயபண்டியம்மாள் என்பவரது கணவர் பாலமுருகன் என்பவருக்கும் விரோதம் இருந்து வந்ததாக கூறப்படுகிறது. இந்நிலையில் அனந்தராமனை கூலிப்படையை ஏவி கொலை செய்தது யார் என்பது குறித்து வச்சக்காரபட்டி போலீஸார் தனிப்படை அமைத்து தீவிர விசாரணை நடத்தி வருகின்றனர்.

Views: - 340

0

0