வானில் துப்பாக்கியால் சுட்டு தலீபான்கள் கொண்டாட்டம்: 17 பேர் உயிரிழப்பு….

Author: Udhayakumar Raman
4 September 2021, 10:56 pm
Quick Share

ஆப்கானிஸ்தானின் தலைநகர் காபூலில் தலிபான்கள் வெற்றியை கொண்டாடும் விதமாக வானத்தை நோக்கி துப்பாக்கியால் சுட்டதில் 17 பேர் உயிரிழந்ததாக தெரிவிக்கப்பட்டுள்ளது.

தெற்கு ஆசிய நாடான ஆப்கானிஸ்தானில், சுமார் 20 ஆண்டுகளுக்கு பிறகு, அமெரிக்கப் படைகள் வெளியேறியதை அடுத்து, ஆட்சி அதிகாரத்தை தலிபான் அமைப்பினர் கைப்பற்றி உள்ளனர். இதனால் தலிபான் போராளிகள் மகிழ்ச்சியின் உச்சியில் திளைத்துள்ளனர்.இதைத் தொடர்ந்து, ஆப்கானிஸ்தான் நாட்டில் ஆட்சி அமைக்கும் பணியில் தலிபான் அமைப்பினர் படு தீவிரமாக ஈடுபட்டுள்ளனர். இது தொடர்பாக தலிபான் அமைப்பின் மூத்த அதிகாரிகள் இடையே பேச்சுவார்த்தை நடைபெற்று வருகிறது.தலிபான் அமைப்பின் அரசியல் பிரிவுத் தலைவர் முல்லா அப்துல் கனி பரதர் தலைமையில் ஆட்சி அமைய உள்ளதாக தகவல்கள் தெரிவிக்கின்றன. இது தொடர்பான அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.

ஆப்கானிஸ்தானில் தலிபான்கள் எதிர்ப்புப் போராளிகளின் கட்டுப்பாட்டில் உள்ள பஞ்ச்ஷிர் மாகாணம் தலிபான்களுக்கு அடி பணிய போவதில்லை என்றும், எதிர்த்து போரிட தயார் என்றும் கடந்த சில நாட்களுக்கு முன்பு அறிவித்திருந்தனர்.இந்நிலையில், இரு தரப்பினருக்கும் இடையே நடைபெற்ற பேச்சுவார்த்தை தோல்வியில் முடிந்ததாக கூறப்பட்ட நிலையில், தற்போது பஞ்ச்ஷிரை தலிபான்கள் கைப்பற்றி உள்ளதாக அறிவித்துள்ளனர். இந்த வெற்றியை போர்க்களத்தில் கொண்டாட தலிபான்கள் நேற்று இரவு வானத்தை நோக்கி துப்பாக்கியால் சுட்டு கொண்டாடி உள்ளனர். இந்த துப்பாக்கிச் சூடு சம்பவத்தில் பொது மக்கள் 17 பேர் கொல்லப்பட்டு உள்ளதாக காபூலில் இருக்கும் மருத்துவமனைகள் தகவல் வெளியிட்டுள்ளது.

Views: - 279

0

0