அமெரிக்கா 60 மில்லியன் இந்தியா 11 மில்லியன்..! டொனால்டு டிரம்ப் சொல்லும் கணக்கு இது தான்..?

1 August 2020, 4:29 pm
Donald_Trump_UpdateNews360
Quick Share

ஜனாதிபதி டொனால்ட் டிரம்ப் தனது நிர்வாகம் கொரோனா தொற்றுநோயைக் கையாள்வதை விமர்சிப்பதை எதிர்த்துப் போராடுகிறார். இதற்காக அவர் இந்தியாவையும் அமெரிக்காவுடன் ஒப்பிட்டுள்ளார்.

“நாடு முழுவதும் கிட்டத்தட்ட 60 மில்லியன் மக்களை நாங்கள் சோதித்தோம். இது இந்தியாவை விட ஆறு மடங்கு அதிகம்” என்று டிரம்ப் புளோரிடாவில் நேற்று கூறினார். இந்தியாவில் தற்போது வரை 11 மில்லியன் மக்கள் கொரோனாவுக்காக சோதிக்கப்பட்டுள்ளார்கள் என அவர் மேலும் தெரிவித்தார்

இந்தியா 1,81,90,382 கொரோனா சோதனைகளை நடத்தியுள்ளதாக இந்திய மருத்துவ ஆராய்ச்சி கவுன்சில் தெரிவித்துள்ளது.

“நாங்கள் இப்போது ஒரு நாளைக்கு சராசரியாக 8,10,000 சோதனைகளை மேற்கொண்டு வருகிறோம். ஜூலை மாதத்தில் ஒரே நாளில் 9,30,000 க்கும் மேற்பட்ட கொரோனா சோதனைகள் நடத்தப்பட்டன” என்று வெள்ளை மாளிகை அறிக்கை தெரிவித்துள்ளது.

“இந்தியா அமெரிக்காவை விட நான்கு மடங்கு பெரிய மக்கள்தொகையைக் கொண்டுள்ளது. ஆனால் சோதனைகளின் எண்ணிக்கையில் மூன்றில் ஒரு பங்கை மட்டுமே நடத்தியுள்ளது.” என தெரிவித்துள்ளார்.

அமெரிக்கா உட்பட, உலகெங்கிலும் மற்றவர்களைப் பின்பற்றுவதற்கான நாடாக தென் கொரியா பெரும்பாலும் மேற்கோள் காட்டப்பட்டுள்ளது. அதன் அதிகப்படியான சோதனை மற்றும் தொடர்புத் தடமறிதலுக்காக தென் கொரியா மேற்கோள் காட்டப்படுகிறது.

ஆனால் அதிபர் டிரம்ப் இந்தியாவுடன் ஒப்பிடுவதையே விரும்புகிறார்.

கடந்த வாரம் ஜூலை 23 அன்று கூட டிரம்ப் செய்தியாளர்களிடம், “உலகில் மக்கள் தொகையில் இரண்டாவது இடத்தில் இந்தியா உள்ளது. இது 1.4 பில்லியன் மக்களைக் கொண்டுள்ளது. அவர்கள் 12 மில்லியன் சோதனைகள் மட்டுமே மேற்கொண்டுள்ளனர். அமெரிக்கா 50 மில்லியன் சோதனைகளை செய்துள்ளது” என்று கூறியிருந்தார்.

பின்னர் மறுநாள், “சோதனைகளில் நாங்கள் உலகை வழிநடத்துகிறோம். இரண்டாவது நாடாக 12 மில்லியன் சோதனைகளுடன் இந்தியா உள்ளது.” எனக் கூறினார்.

100 ஆண்டுகளில் நாட்டின் மிக மோசமான சுகாதார நெருக்கடியுடன் ஜனாதிபதி டிரம்ப் தொடர்ந்து ஈடுபடுவது, தேர்தல் சமயத்தில் அவருக்கு பெரும் நெருக்கடியை ஏற்படுத்தியுள்ளதாகக் கூறப்படுகிறது.

Leave a Reply