முன்னாள் அமைச்சர் மணிகண்டனுக்கு ஜூலை 2 வரை காவல் : இருவரும் விரும்பி பழகியது வன்கொடுமையாகாது.. நீதிமன்றம் கருத்து!!

20 June 2021, 9:09 pm
Quick Share

சென்னை: அதிமுக முன்னாள் அமைச்சர் மணிகண்டனுக்கு ஜூலை 2-ம் தேதி வரை நீதிமன்ற காவல் விதிக்கப்பட்டுள்ளது.

சென்னை பெசன்ட்நகரில் வசித்து வருபவர் நடிகை சாந்தினி. நாடோடிகள் சினிமா படத்தில் நடித்துள்ளார். மலேசியா நாட்டின் குடியுரிமை பெற்ற இவர் சென்னை போலீஸ் கமிஷனர் அலுவலகத்தில் அ.தி.மு.க. முன்னாள் அமைச்சர் மணிகண்டன் மீது பரபரப்பு புகார் மனு ஒன்றை கொடுத்தார்.அந்த புகார் மனுவில், மணிகண்டன் என்னை திருமணம் செய்வதாக சொல்லி உறவு வைத்தார். 5 வருடங்கள் நானும், அவரும் கணவன்-மனைவி போல வாழ்ந்தோம். 3 முறை அவர் மூலம் கர்ப்பம் அடைந்தேன். அவரது மிரட்டலின் பேரில் கருவை கலைத்தேன். இப்போது என்னை திருமணம் செய்ய மறுத்து அவர் கொலை செய்து விடுவதாக மிரட்டுகிறார், என்று தெரிவித்து இருந்தார்.

இந்த புகார் மனு மீது அடையாறு அனைத்து மகளிர் போலீசார் விசாரணை நடத்தினார்கள். மணிகண்டன் மீது 6 சட்டப்பிரிவுகளின் கீழ் அடையாறு அனைத்து மகளிர் போலீசார் வழக்குப்பதிவு செய்தனர். இந்த நிலையில் மணிகண்டன் முன்ஜாமீன் கோரி சென்னை ஐகோர்ட்டில் மனு தாக்கல் செய்தார். இந்த மனுவை சென்னை ஐகோர்ட் தள்ளுபடி செய்தது. இதையடுத்து தலைமறைவாக இருந்த மணிகண்டனை கைது செய்ய போலீசார் விரைந்தனர். அவரைப் பிடிக்க இரண்டு தனிப்படைகள் அமைக்கப்பட்டன. இந்நிலையில், நடிகை சாந்தினி அளித்த பாலியல் புகாரில் தேடப்பட்டு வந்த அதிமுக முன்னாள் அமைச்சர் மணிகண்டனை போலீசார் இன்று கைது செய்தனர்.

கைது செய்யப்பட்ட மணிகண்டனை ரகசிய இடத்தில் வைத்து காவல்துறையினர் விசாரணை நடத்தினர். இதையடுத்து அதிமுக முன்னாள் அமைச்சர் மணிகண்டனை சைதாப்பேட்டை நீதிமன்ற மாஜிஸ்திரேட் முன்னிலையில் ஆஜர்படுத்தினர். இந்த வழக்கை விசாரித்த நீதிபதி அதிமுக முன்னாள் அமைச்சர் மணிகண்டனுக்கு ஜூலை 2-ம் தேதி வரை நீதிமன்ற காவல் விதிக்கப்பட்டுள்ளது. மேலும் இருவரும் விருப்பத்துடன் பழகியதால் பாலியல் வன்கொடுமையாக கருதமுடியாது எனவும் நீதிபதி கருத்து தெரிவித்துள்ளார்.

Views: - 216

0

0