வாய்க்காலில் குழியில் தவறி விழுந்த சிறுவன் மணல் மூடி உயிரிழப்பு

14 June 2021, 3:33 pm
Quick Share

மயிலாடுதுறை: மயிலாடுதுறையில் வாய்க்காலில் மணல் திருடப்பட்ட குழியில் தவறி விழுந்த சிறுவன் மணல் மூடி சம்பவ இடத்திலேயே உயிரிழந்த சம்பவம் பெரும் சோகத்தை ஏற்படுத்தியுள்ளது :-

மயிலாடுதுறை மாவட்டம் குத்தாலம் அருகே உள்ள நச்சினார்குடியை சேர்ந்த செல்லதுரை மற்றும் ராஜேஸ்வரி தம்பதியினர். கொத்தனார் வேலை பார்த்து வரும் செல்லதுரைக்கு ரமேஷ் மற்றும் தீபக் என்ற 2 மகன்கள் உள்ளனர். இதில் இளைய மகன் தீபக் அதே ஊரில் உள்ள அரசு பள்ளியில் ஆறாம் வகுப்பு படித்து வருகிறார். கரோணா ஊரடங்கு காரணமாக பள்ளிகள் திறக்கப்படாததால் மாணவர்கள் வீட்டில் இருந்தபடியே இணையவழிக் கல்வி பயின்று வரும் நிலையில் செல்லதுரையின் இளைய மகன் தீபக் இன்று காலை அவரது வீட்டில் அருகே திரௌபதி அம்மன் கோவில் பின்புறம் உள்ள வாய்க்காலில் நண்பர்களுடன் விளையாட சென்றுள்ளான். அப்போது அதே பகுதியை சேர்ந்த சிலர் வாய்க்காலின் திருட்டு மணல் எடுத்துள்ளனர்.

இதனால் அந்த பகுதி 10 அடி ஆழம் குழியாக காணப்பட்ட நிலையில் அதில் விளையாட சென்ற தீபக் தவறி விழுந்துள்ளான். பின்னர் அவன் மீது மணல் மற்றும் மணல் கட்டிகள் சரிந்து விழுந்து உள்ளது. மணல் முழுவதுமாக மூடியதில் மூச்சு விட முடியாமல் தீபக் சம்பவ இடத்திலேயே உயிரிழந்துள்ளான். தீபக்கின் நண்பர்கள் உடனடியாக அவரது பெற்றோருக்கு தகவல் தெரிவித்துள்ளனர். இதனைத் தொடர்ந்து பெற்றோர்கள் மற்றும் ஊர் பொதுமக்கள் தீபக்கை மீட்டு குத்தாலம் அரசு மருத்துவமனைக்கு எடுத்துச் சென்றுள்ளனர். தீபக்கை பரிசோதனை செய்த மருத்துவர்கள் அவர் உயிரிழந்துவிட்டதாக உறுதிப்படுத்தினர். பின்பு சம்பவ இடத்திற்கு வந்த பாலையூர் காவல்துறையினர் சிறுவன் மணல் குழியில் விழுந்து இறந்தது தொடர்பாக விசாரணை மேற்கொண்டு வருகின்றனர்.

Views: - 125

0

0