ஆடி பதினெட்டாம் பெருக்கு

1 August 2020, 10:51 pm
Quick Share

ஆடிப்பெருக்கு என்பது ஆடி மாதம் 18ஆம் நாள் தமிழக ஆறுகள் பெருக்கெடுத்து ஓடுவதைக் குறிக்கும். இதனை பதினெட்டாம் பெருக்கு என்றும் கூறுவார்கள். உழவர்கள் இந்நாளில் நம்பிக்கையுடன் பட்டம் பார்த்து விதை விதைப்பார்கள். இப்பொழுது நெல், கரும்பு முதலியவற்றை விதைத்தால் தான் அவர்கள் தை மாதத்தில் அறுவடை செய்ய முடியும். அதற்கு வற்றா நதிகளை தங்கள் கடவுளாக போற்றி மகிழ்ந்து, பூசைகள் செய்து பின் உழவு வேலையை தொடங்குவார்கள்.

இதனையொட்டியே ஆடிப்பட்டம் தேடிவிதை என்ற பழமொழியும் வந்தது. மக்கள் ஆற்றங்கரைகளில் கூடி ஆற்றுப் பெருக்கைக் கண்டு களிப்பார்கள். இந்து சமயத்தவர் கோயில்களில் சென்று வழிபடவும் செய்வர். அன்றைய நாள் பெண்கள் ஆற்றில் குளித்து ஆற்றங்கரையில் ஒவ்வொருவரும் பூஜை செய்ய ஒரு இடத்தைப் பிடித்து தேர்வு செய்ய வேண்டும். அந்த இடத்தை சுத்தம் செய்து, பசு சாணத்தால் மெழுகி அதன் மேல் வாழை இலையை விரித்து, பிள்ளையார் சிலை வைத்து அதன் முன் அகல்விளக்கு ஏற்றி வைக்க வேண்டும்.

வழிபாட்டில் வெற்றிலை, பாக்கு, பழம் படைத்து, பத்தி, கற்பூரம் காட்டி, தடங்கல் இல்லாத விளைச்சலுக்கு விநாயகரை வழிபடவேண்டும். ஆற்றினை வழிபட்டு வாழை மட்டையில் விளக்குகள் ஏற்றி, அதை ஆற்றில் விடலாம். இப்படி செய்தால், நீர் வளம் பெருகியது போல், அவர்கள் வாழ்க்கையிலும் மகிழ்ச்சியும் செல்வமும் பெருகும் என்பது சாஸ்திரமாகும். அது மட்டும் அல்லாமல் தங்கள் வீட்டில் பல விதமான கலப்பு சாதங்கள் (தேங்காய் சாதம், சர்க்கரைப் பொங்கல், எலுமிச்சம் பழம் சாதம், தக்காளி சாதம், தயிர் சாதம்) செய்து அதை ஏதாவது ஆற்றங்கறையில் வைத்து குடும்பத்துடனும், நண்பர்களுடனும் சேர்ந்து குதூகலமாக உணவை சாப்பிடும் பழக்கம் பழங்காலத்தில் இருந்தே உள்ளது.

மேலும் புது திருமண தம்பதிகளுக்கு மாங்கல்யத்தை பெருக்கி போடுவற்கு சிறந்த நாளாகும். ஒவ்வொரு பெண்களும் தன்னுடைய மாங்கல்ய கயிற்றை,சுமங்கலி பெண்ணின் கையால் மஞ்சல் பூசி புது கயிறு அணிவித்து கொள்வார்கள். இதனால் தன்னுடைய மாங்கல்ய பாக்கியம் பெருகும் என்பது நம்பிக்கை ஆகும். இந்த வருடம் கொரோனோவால் ஆற்றங்கரை, குளத்தங்கரை செல்ல முடியாதவர்கள் வீட்டில் கிணற்றடியிலோ,பைப் அருகிலோ சாமி கும்பிட்டு மஞ்ச கயிற்றை மாற்றிக்கொள்ளலாம். நாளை ஞாயிற்றுக்கிழமை இந்த ஆடிப்பெருக்கு விழாவை மானசீகமாக கொண்டாடுவோம்.